唐吉訶德 (芭蕾舞劇)

唐吉訶德》(粵拼tong4 gat1 ho1 dak1英文Don Quixote西班牙文Don Quijote)係一齣四幕芭蕾舞劇,由法國裔俄羅斯大芭蕾舞蹈員及編舞師莫里斯·珀蒂帕(Marius Petipa)編寫,捷克裔大作曲家路德維希·明古斯(Ludwig Minkus)作曲,首次喺 1869 年 12 月 26 號公演於莫斯科。而打後珀蒂帕同明古斯為馬林斯基芭蕾舞團(Mariinsky Ballet)將齣劇改過版,成五幕,而呢個版本喺 1871 年 11 月 21 號上演於聖彼得堡[1]

2013 年委內瑞拉一場《唐吉訶德》表演嘅第一幕其中一段;彼此相愛、但得唔到父母祝福嘅男女主角跳緊雙人舞
同場表演一幕;唐吉訶德原著小說出自西班牙,所以唐吉訶德芭蕾舞劇舞蹈員好多時會著西班牙風嘅服裝。
同場表演嘅閉幕;一眾舞蹈員一齊向觀眾行禮,企中間嗰個就係主角唐吉訶德。

時至今日,唐吉訶德經已係世上其中一齣最常俾人返炒嘅芭蕾舞劇[1]

. . . 唐吉訶德 (芭蕾舞劇) . . .

將呢本塞萬提斯入舞,珀蒂帕同明古斯並非第一人。1740年維也納編舞家凡士希維定(Franz Hilverding)就按原著角色安排編排過。該版本1786年於巴黎被現代芭蕾舞之父諾維讓(Jean-Georges Noverrein)重新編排過。

但原著主角嘅安排,缺乏一對男女主角互動,從而難以安排雙人舞,係將小說《唐吉訶德》改編為芭蕾舞劇嘅一大難題。呢個難題喺1801年,俾巴黎歌劇院嘅芭蕾舞總監米隆成功解決。米隆選粹小說嘅第二部中嘅兩個章節改編而成,將主角則變成咗酒庄老闆女兒潔特妮(Kitri,原著中嘅 Quiteria)及同村嘅窮飛髮師傅巴西里奧(Basilio)呢對情人。[2]

睇埋:唐吉訶德

唐吉訶德芭蕾舞劇個故仔建基於同名嘅西班牙文小說,原版個流程如下[3][4]

  • 序幕講主角唐吉訶德醉心於幻想自己係個騎士,並且決定騎住隻馬,以流浪騎士嘅身份去冒險,想像自己會撞到佢心目中嘅完美女神豆善妮雅(Dulcinea);
  • 第一幕場景一個西班牙小鎮,平民少女潔特妮(Kitri)同身為飛髮師傅嘅巴西里奧(Basilio)相愛,但潔特妮阿爸羅倫佐(Lorenzo)想潔特妮嫁俾個(潔特妮唔鍾意嘅)貴族男人加瑪錢(Gamache),於是潔特妮離家出走,當時個小鎮有班後生仔喺度騷擾本地嘅係生女,班後生女嘅屋企人同嗰班後生仔衝撞;喺混亂當中,唐吉訶德以為潔特妮就係豆善妮雅,同時潔特妮同巴西里奧終於決定私奔,而唐吉訶德見到潔特妮同巴西里奧相愛,覺得妒忌,跟住受羅倫佐委託,幫手去拉潔特妮同巴西里奧返嚟;
  • 第二幕講唐吉訶德追,去到條小村落嗰度,撞到班羅姆人,引起混亂,打後佢係個風車隔離受咗傷,喺森林入面撞到班仙子,仲去到一個古怪花園入面,見到豆善妮雅(有版本話唐吉訶德發緊夢);
  • 第三幕講唐吉訶德、加瑪錢、同羅倫佐終於追上潔特妮同巴西里奧,巴西里奧攞把劍自插,以死囈羅倫佐俾佢同潔特妮結婚,但加瑪錢唔理佢,唐吉訶德就要求同佢單挑(理由係加瑪錢拒絕一個垂死者嘅最後願望),加瑪錢走佬,然後羅倫佐無可奈何噉應承俾兩個人結婚-呢個時候巴西里奧攞返把劍出嚟,原來佢衹係扮自插;
  • 第四幕就講潔特妮同巴西里奧結得成婚,有情人終成眷屬。

喺編舞上,唐吉訶德芭蕾舞劇有以下特徵[4]

  • 場表演首先實會有好幾段由潔特妮同巴西里奧一齊跳嘅雙人舞,多數亦會有由唐吉訶德做嘅變奏舞
  • 第一幕中段,通常會有段由一大班配角男女舞蹈員跳嘅舞-扮演個小鎮嘅居民;
  • 第四幕講有情人終成眷屬,會有一班配角跳歡樂嘅舞;
  • 喺第二幕豆善妮雅出場嗰段,會有一班女舞蹈員扮演仙子配合佢跳舞,然後會有唐吉訶德同豆善妮雅做嘅雙人舞;
  • 羅倫佐同加瑪錢通常會由年紀大啲(體力冇噉好)嘅男舞蹈員飾演,亦都因為噉比較少會跳變奏舞。

. . . 唐吉訶德 (芭蕾舞劇) . . .

This article is issued from web site Wikipedia. The original article may be a bit shortened or modified. Some links may have been modified. The text is licensed under “Creative Commons – Attribution – Sharealike” [1] and some of the text can also be licensed under the terms of the “GNU Free Documentation License” [2]. Additional terms may apply for the media files. By using this site, you agree to our Legal pages . Web links: [1] [2]

. . . 唐吉訶德 (芭蕾舞劇) . . .

Previous post 陳偉文
Next post 棠東站